ប្រែសម្រួល៖ តារា
លោក អាំងហ្គេ ប៉ុសតេកូឡូ គ្រូបង្វឹកក្លិប តុតតិនហាម ហុតស្ពឺ បានថ្លែងថា ក្លិបភាគខាងជើងទីក្រុងឡុងដ៍ កំពុង «លេងល្បែងគ្រោះថ្នាក់» ប្រសិនបើមិនចុះកិច្ចសន្យាជាមួយកីឡាករថ្មីក្នុងរយៈពេលផ្ទេរកីឡាករខែមករានេះ ខណៈក្រុមដែលរងការប៉ះពាល់ដោយរបួសនេះ បន្តជួបការលំបាកនៅក្នុងក្រប័ខណ្ឌ Premier League។
ក្រុម Spurs ស្ថិតនៅលំដាប់ថ្នាក់ទី១៥ ក្នុងតារាងពិន្ទុ ដែលស្ថិតនៅជិតតំបន់កាត់ចោល ជាងតំបន់ប្រកួតប្រជែងអឺរ៉ុប បន្ទាប់ពីឈ្នះតែមួយប្រកួតប៉ុណ្ណោះក្នុងចំណោម១០ប្រកួតចុងក្រោយ ដែលរួមមានការចាញ់៧ប្រកួត។ ក្លិបមានកីឡាករ១២រូបរងរបួស ដែលច្រើនជាងគេក្នុងក្របខ័ណ្ឌនេះ រួមទាំងកីឡាករថ្លៃបំផុតរបស់ក្លិប ដូមីនិក សូឡាំកេ។ ខ្សែប្រយុទ្ធអង់គ្លេសរូបនេះ រំពឹងថានឹងត្រូវសម្រាកព្យាបាលរបួសជង្គង់រយៈពេល៦សប្តាហ៍។
លោក ប៉ុសតេកូឡូ បានដាក់បញ្ចូលកីឡាករវ័យក្មេងជាច្រើនទៅក្នុងក្រុម ដើម្បីដោះស្រាយវិបត្តិរបួស ហើយបានថ្លែងថា លោកមានការពិភាក្សាប្រចាំថ្ងៃជាមួយនាយកបច្ចេកទេសរបស់ក្លិប លោក យូហាន ឡាំងហ្គេ អំពី «ការព្យាយាមរកជំនួយសម្រាប់កីឡាករ» តាមរយៈការទិញកីឡាករថ្មី។
លោកបានថ្លែងប្រាប់អ្នកកាសែតថា៖ «ខ្ញុំមិនមែននៅទីនោះដើម្បីស្វែងរកឱកាសសម្រាប់ក្លិបទេ នោះមិនមែនជាតួនាទីរបស់ខ្ញុំនៅពេលនេះទេ។ គ្មានពេលធ្វើវាទេ។»
«ខ្ញុំមិនគិតថាខ្ញុំកំពុងនិយាយអ្វីក្រៅពីការពិតទេ ហើយប្រសិនបើខ្ញុំមកទីនេះហើយនិយាយអ្វីផ្សេង វានឹងមិនស្មោះត្រង់ទេ។ ក្រុមកីឡាករនេះត្រូវការជំនួយ គ្មានការសង្ស័យទេ។»
«យើងហាក់ដូចជាកំពុងលេងល្បែងគ្រោះថ្នាក់ដោយមិនទិញកីឡាករថ្មី ប៉ុន្តែម្យ៉ាងវិញទៀត ក្លិបកំពុងព្យាយាមផ្លាស់ប្តូរស្ថានការណ៍នោះ។»
ទោះបីជាក្លិបមានទម្រង់លេងមិនល្អក៏ដោយ ក្រុម Spurs នៅតែទុកចិត្តលោក ប៉ុសតេកូឡូ បន្ទាប់ពីលោកបានដឹកនាំក្រុមឈានដល់វគ្គពាក់កណ្តាលផ្តាច់ព្រ័ត្រពាន League Cup ដែលពួកគេកំពុងនាំមុខក្រុម Liverpool ១-០ បន្ទាប់ពីប្រកួតជើងទីមួយ។ ប្រកួតជើងទីពីរនឹងធ្វើឡើងនៅកីឡដ្ឋាន Anfield នៅថ្ងៃទី៦ ខែកុម្ភៈ។
ក្រុម Spurs ក៏ទទួលបានដំណឹងល្អពីការវិលត្រឡប់មកហ្វឹកហាត់របស់ គ្រីស្ទៀន រ៉ូមេរ៉ូ ខណៈដែលដៃគូខ្សែការពារកណ្តាលរបស់គេ មីគី វ៉ាន ដឺ វែន ក៏រំពឹងថានឹងត្រៀមខ្លួនរួចរាល់មុនប្រកួតជើងទីពីរផងដែរ។
លោក ប៉ុសតេកូឡូ បានថ្លែងថា៖ «ក្នុងចំណោមកីឡាកររងរបួសរយៈពេលវែង មានតែពួកគេទាំងពីរទេដែលមានឱកាសត្រឡប់មកវិញនៅសប្តាហ៍នោះ ប៉ុន្តែយើងនៅសល់១២ថ្ងៃ ឬអ្វីមួយបែបនោះ។» «ផ្នែកមួយនៃដំណើរការនោះគឺត្រូវមើលថាតើពួកគេដោះស្រាយយ៉ាងណាជាមួយនឹងការហ្វឹកហាត់ក្នុងសប្តាហ៍ក្រោយៗទៀត។ ពួកគេទាំងពីរត្រូវបានគ្រោងនឹងអាចវិលត្រឡប់មកវិញប្រហែលពេលនោះ៕»
ប្រភព៖ Reuters
